KWA MAONI AU USHAURI E-mail: inocomm2014@gmail.com, PIGA SIMU: 0714555668

www.utt-pid.org


TEMBELEA: www.utt-pid.org

September 14, 2018

TUME YA TAIFA YA UCHAGUZI (NEC) YATANGAZA UCHAGUZI MDOGO WA UDIWANI KATIKA KATA 37

Mwandishi wetu
Tume ya Taifa ya Uchaguzi (NEC) imetangaza uchaguzi mdogo wa udiwani katika kata 37 za Tanzania Bara zilizopo katika Halmashauri 27 na mikoa 13 ya Tanzania Bara,  utakaofanyika tarehe 13 Oktoba mwaka huu.

Akitangaza uchaguzi huo, Mwenyekiti wa NEC Jaji wa Mahakama ya Rufaa Semistocles Kaijage, alisema fomu za uteuzi wa wagombea katika uchaguzi huo zitatolewa kati ya tarehe 15 hadi 21 Septemba, mwaka huu.

Alisema uteuzi wa wagombea utafanyika tarehe 21 Septemba, mwaka huu wakati kampeni za Uchaguzi zitafanyika kuanzia tarehe 22 Septemba hadi tarehe 12 Oktoba mwaka huu.

Jaji Kaijage alifafanua kuwa uchaguzi huo unafuatia Tume kupokea taarifa ya uwepo wa nafasi wazi za udiwani kwenye kata hizo kutoka kwa Waziri mwenye dhamana na Serikali za Mitaa kwa kutumia kifungu cha 13(1) cha Sheria ya Uchaguzi ya Serikali za Mitaa.

“Baada ya kupokea taarifa hiyo na kwa kuzingatia masharti ya kifungu cha 13(3) cha Sheria ya Uchaguzi ya Serikali za Mitaa; Tume ina utaarifu umma kuhusu kuwepo kwa Uchaguzi mdogo katika Kata hizo thelathini na saba (37).”, alisema Jaji Kaijage.

Kufuatia uchaguzi huo, Mwenyekiti huyo wa NEC alivialika Vyama vya Siasa, Wadau wote wa Uchaguzi na Wananchi kwa ujumla kushiriki katika Uchaguzi huo.

Aliongeza kwa kuviasa Vyama vya Siasa na Wadau wa Uchaguzi kuzingatia matakwa ya Katiba, Sheria ya Uchaguzi ya Serikali za Mitaa, Kanuni za Uchaguzi wa Serikali za Mitaa (Madiwani), 2015, Maadili ya Uchaguzi wa Rais, Wabunge na Madiwani ya mwaka 2015 na maelekezo yote yaliyotolewa au yatakayotolewa na Tume wakati wote wa Uchaguzi huo.

Wakati huo, Tume ya Taifa ya Uchaguzi imewateua Madiwani watatu Wanawake wa Viti Maalum kujaza nafasi wazi za madiwani katika Halmashauri tatu za Tanzania Bara.

Akitangaza uteuzi huo, Mwenyekiti wa NEC Jaji wa Mahakama ya Rufaa Semistocles Kaijage, aliwataja madiwani hao kuwa ni Halima Salum Kisenga (CCM) wa Halmashauri ya Wilaya ya Kigamboni.

Wengine walioteuliwa ni Emmy Anania Shemweta kupitia CCM katika Halmashauri ya Wilaya ya Lushoto na Nuru Mwalimu Chuma kupitia Chama cha Wananchi (CUF) katika Halmashauri ya Manispaa ya Ilala.

Jaji Kaijage alisema uteuzi huo umefanyika baada ya kupokea taarifa kutoka kwa Waziri mwenye dhamana ya Serikali za Mitaa, ambaye aliitarifu Tume kuwepo kwa nafasi wazi kupitia vyama hivyo baada ya walioteuliwa kufariki dunia na kujiuzulu.

HABARI ZILIZOPO KATIKA MAGAZETI YA LEO IJUMAA YA SEPTEMBA 14

September 13, 2018

MGOMBEA CHADEMA UKONGA AHOFIA KUTEKWA

Mgombea ubunge wa Chama cha Demokrasia na Maendeleo (CHADEMA) jimbo la Ukonga jijini Dar es salaam Asia Msangi amesema miongoni mwa changamoto anazokutana nazo kuelekea uchaguzi wa marudio jimbo hilo utakaofanyika siku ya jumapili ya  septemba 16, ni hofu ya kutekwa na watu wasiojulikana.

Akizungumza katika kituo cha EATV leo, mgombea huyo wa CHADEMA amesema kupitia viongozi wa juu wa chama chake wamepokea taarifa juu ya uvumi wa kutaka kutekwa siku moja kabla ya zoezi la kupiga kura.

“…Baadhi ya changamoto kwenye uchaguzi huu wa marudio ninazokutana nazo .., kuna baadhi ya watu wetu wanatishiwa kutekwa na kuna mwingine alitekwa ila kwa ushirikiano na mwenyekiti jana amepatikana.., lakini pia kupitia viongozi wa juu wa chama tumepokea taarifa ya mimi kutaka kutekwa kabla ya jumamosi na hili jambo tutalifikisha polisi. ” Amesema Asia Msangi

Aidha Asia Msangi amesema licha ya  miradi mbalimbali ya maendeleo inayotekelezwa na Chama cha Mapinduzi (CCM) kupitia seikali ya awamu ya tano ikiwemo reli ya kisasa (SGR), ununuaji wa ndege pamoja na Shirika la ndege la Tanzania ATCL anaamini miradi hiyo haiwezi kuwa kikwazo cha kutoshinda uchaguzi wa jimbo hilo.

“ Licha ya miradi ya maendeleo inayotekelezwa na Rais Magufuli bado maisha ya mwananchi mmoja mmoja wa jimbo la ukonga ni magumu.., hiyo miradi haiakisi chochote.., wananchi wa ukonga hawawezi kunufaika..”Ameongeza Asia Msangi

Uchaguzi wa jimbo la Ukonga unarudiwa kufuatia aliyekua Mbunge wa jimbo hilo kupitia CHADEMA Mwita Waitara kutangaza kujivua nafasi hiyo Julai 28 mwaka huu kwa madai ya kuwa na mgogoro na Mwenyekiti wa chama hicho Freeman Mbowe.

SERIKALI KUWEZESHA VITUO VYA UTAFITI ILI KUONGEZA UZALISHAJI WA AINA MPYA WA MBEGU BORA

Na Mathias Canal-WK, Arusha
Serikali imeahidi kuendelea kuwezesha vituo vyake vya utafiti kote nchini kwa lengo la kuongeza uzalishaji wa aina mpya za mbegu bora za mazao mbali mbali.

Kauli hiyo imetolewa na Mhe Dkt Charles Tizeba Waziri wa Kilimo, wakati akifungua mkutano wa siku mbili wa wadau wa mbegu ambapo ni mjumuiko wa Jumuiya ya Wafanyabiashara ya Mbegu (TASTA), TOSCI, USAID East Africa Trade Investment Hub, AGRA-MIRA Project, AATF, ASA na TPRI kwa kushirikiana na wizara ya Kilimo na wadau wengine wa maendeleo unaofanyika katika Ukumbi wa Mount Meru Hotel Jijini Arusha.

Alisema kuwa katika kuhakikisha kuwa Wizara ya kilimo inafikia hatua ya kuwa na uzalishaji Wa aina mpya za mbegu bora za Mazao mbalimbali tayari serikali imechukua hatua ya kuanzisha Taasisi ya Utafiti Wa kilimo - TARI kwa lengo la kuboresha utendaji wa kitafiti ili kuleta tija katika ugunduzi wa aina mpya za mbegu.

Alisema kuwa TARI itasaidia kuongeza uzalishaji wa mbegu bora hapa nchini na hivyo kuwa na matokeo chanya ya uhakika wa chakula katika ngazi ya kaya na Taifa kwa ujumla pia kuongeza kipato kutokana na ziada.

Dkt Tizeba alisema kuwa Mpango wa Kuendeleza sekta ya Kilimo awamu ya pili – ASDP II ambao Mhe Rais wa Jamhuri ya Muungano wa Tanzania Dkt John Pombe Magufuli ameuzindua hivi karibuni unasisitiza masuala ya uendelezaji wa kilimo chenye tija, Kilimo biashara chenye kuboresha mapato ya mkulima na kilimo  kinachomhakikishia mkulima usalama wa chakula na lishe.

"Haiwezi kuwa rahisi kuongeza uzalishaji wa kilimo hapa nchini kama msingi wa kilimo ambao ni uzalishaji wa mbegu bado tutakuwa tumeuacha nyuma pasina kuweka msisitizo hapo, hivyo tunapaswa kutazama upya namna bora ya kupunguza gharama ya mbegu" Alikaririwa Mhe Dkt Tizeba na kuongeza kuwa

"Baada ya serikali kujitoa katika uendeshaji wa biashara mbalimbali na kuruhusu sekta binafsi kufanya biashara, hii ilitoa fursa kwa sekta binafsi kushiriki katika tasnia mbalimbali ikiwemo hii ya mbegu, lengo kuu la dhana hii ya ushirikishaji wa sekta binafsi na ile ya umma (PPP) ni kuwezesha na kuhakikisha kwamba maslahi mapana ya wakulima yanalindwa na mazingira ya biashara yanaboreshwa ili wakulima na sekta binafsi wote wafaidike na jitihada wanazozifanya"

Waziri Tizeba aliongeza kuwa Ili kutekeleza lengo la kuongeza tija na uzalishaji katika sekta ya mbegu, Wizara ya Kilimo kupitia Sheria ya Mbegu ya Mwaka 2003, imeweka mifumo mbalimbali ya namna ya kutoa na kufikisha huduma kwa wakulima kwa kushirikiana na sekta binafsi kwa lengo la kuboresha huduma hizo ili kuongeza kasi ya ukuaji wa maendeleo ya wakulima.

Alizitaja jitihada hizo kuwa ni katika kutekeleza majukumu ya pamoja katika ubia baina ya sekta ya umma na ile ya binafsi. "Lakini kwa bahati mbaya juhudi hizi hazijazaa matunda yaliyotarajiwa na ndiyo maana mpaka sasa bado tunakabiliwa na changamoto nyingi ikiwemo uzalishaji mdogo wa mbegu, uwepo wa mbegu zisizokidhi viwango vya ubora sokoni na kutegemea mbegu za kuagizwa kutoka nje. Hali hii tunatakiwa kuondokana nayo na kuhakikisha tunazalisha mbegu za kutosha mahitaji ya ndani na ziada kuuza nje" Alisistiza Dkt Tizeba

Aidha, alidema juhudi mbalimbali zinaendelea kufanyika kati ya Serikali na Sekta binafsi katika kupambana na uwepo wa mbegu zisizokidhi viwango vya ubora sokoni. Miongoni mwa juhudi hizo ni kuweka karatasi yenye maelezo na utambulisho ‘label’’ katika vifungashio vya mbegu. "Hii ni sehemu ya utekelezaji wa Sheria ya Mbegu ya mwaka 2003 ambapo utekelezaji wake umekuwa na changamoto nyingi ikiwa ni pamoja na malalamiko ya wafanyabiashara kudai kuwa hizo ‘lebel’ zinaongeza gharama. Hivyo napenda kuchukua fursa hii kuwafahamisha wadau wote wa sekta ya mbegu kuwa hilo ni takwa la kisheria hivyo ni budi sote tulizingatie" Alisema

MWISHO.

KANGI LUGOLA ASHANGAA WANANCHI KUCHOMA MOTO KITUO CHA POLISI MTU AKIFIA HUMO LAKINI HAWACHOMI KITANDA MTU AKIFA ANAFANYA MAPENZI

Waziri wa Mambo ya Ndani ya Nchi, Kangi Lugola amesema, si watu wote wanaopoteza maisha katika vituo vya polisi wanakuwa wameteswa.

Waziri Lugola pia amehoji, kwani nini mtu akipoteza maisha akiwa kituo cha polisi wananchi wanavamia kituo lakini hawachomi nyumba na kitanda mwananchi anapoaga dunia wakati anafanya mapenzi.

Ameyasema hayo bungeni wakati anajibu maswali ya nyongeza  ya wabunge kwenye kikao cha nane cha Mkutano wa 12 wa Bunge unaoendelea jijini Dodoma. 

Lugola amesema, mwananchi anaweza kupoteza maisha wakati wowote na mahalali popote na ndiyo maana kwenye Biblia imeandikwa kifo ni mtego, humnasa mtu wakati wowote na mahali popote.

"Kwa hiyo mwananchi anaweza akafa akiwa polisi, anaweza akafa akiwa anafanya mapenzi, anaweza akafa akiwa kwenye gari anasafiri, anaweza akafia hata humu ndani ya Bunge humu. Kwa hiyo isije ikachukuliwa kwamba anayekufia kwenye kituo cha polisi ni kwamba ameteswa" amesema.

Hata hivyo Waziri Lugola amekiri kuwepo kwa matukio ya wananchi kufia mikononi mwa Polisi.

"Na pale ambapo matukio hayo yanajitokeza tumekuwa tukifanya uchunguzi. Na pale inapobainika kwamba Polisi wamehusika tumekuwa tukichukua hatua. Na ndiyo maana Mheshimiwa Spika tunazuia wananchi wasichukue sheria mikononi za kuanza kuvamia vituo kwa sababu mtu amefia mikononi mwa polisi...

"Na ndiyo maana nimekuwa nikihoji, huyu anayekufa akifanya mapenzi mbona hawaendi kuchoma kitanda na nyumba kwamba amefia mikoni mwa kitanda"amesema Lugola.

Wakati anajibu swali la nyongeza la Mbunge wa Mlimba, Suzan Kiwanga, Waziri Lugola amesema, Jeshi la Polisi halina nia ya kuwatesa wananchi wanapokamatwa na kuwekwa mahabusu.

Mbunge huyo alitaka kufahamu kauli ya Waziri Lugola kuhusu mahabusu kukosa chakula.

"Mahabusu wote wanapata chakula na wapo watu ambao wanapewa tenda hizi za kuleta vyakula kwa mahabusu"amesema na kuongeza kuwa, kuna wananchi wanaoruhusiwa kupeleka vyakula kwa mahabusu.

MAKAMU WA RAIS KUMWAKILISHA RAIS MAGUFULI TAMASHA LA URITHI DODOMA

Makamu wa Rais Samia Suluhu atakuwa mgeni rasmi katika uzunduzi wa tamasha la urithi litakalofanyika kati ya Septemba 15 hadi 22 mwaka huu jijini hapa.

Akizungumza na waandishi wa habari leo Septemba 13 2018, Mkuu wa Mkoa wa Dodoma Dk Binilith Mahenge amesema kuwa Samia atamwakilisha Rais John Magufuli ambaye ndiye awali alikuwa awe mgeni rasmi.

Amesema maonyesho lengo la tamasha hilo ni kupanua wigo wa vivutio vya utalii nchini hususani kwa kuendeleza mazao ya utalii, utamaduni na malikale.

“Kauli mbiu ya maonyesho haya ni ‘Urithi wetu Fahari yetu’ na yatahusisha wadau kuonyesha mambo ya burudani, maigizo, utalii na tamaduni, malikale na kazi mbalimbali za mikoa,”amesema.

Amesema kutakuwa na maandamano yenye shamrashamra za ngoma, machifu, watalii, washahiri, maigizo, wasanii mbalimbali wa ndani na nje ya nchi akiwemo Mrisho Mpoto na Wanne Star.

SEKTA YA MIFUGO KUCHANGIA ASILIMIA 9 YA PATO LA TAIFA

Wizara ya Mifugo na Uvuvi inatekeleza mpango mkakati wa kuendeleza sekta ya mifugo unaotarajiwa kuongeza mchango wa sekta hiyo kwenye pato la Taifa kutoka asilimia 6.9 hadi 9%.

Naibu Waziri wa Wizara hiyo, Abdallah Ulega amesema bungeni jijini Dodoma kuwa, utekelezaji wa mkakati huo pia unatarajiwa kukuza sekta ya mifugo kutoka asilimia 2.8 hadi 5.2%.

Wakati anajibu swali la Mbunge wa Kibaha Mjini, Silyvester Koka, Ulega amesema, mkakati huo una lengo la kupunguza na kuboresha mazingira rafiki na endelevu katika uzalishaji mifugo yenye tija kwa kuzalisha mitamba milioni moja kwa mwaka.

Wabunge wameelezwa kuwa mitamba hiyo itapatikana kutoka makundi ya ng'ombe wa asili kwa kufanya uhimilishaji. Koka alitaka kufahamu Serikali ina mpango gani kuboresha bidhaa za nyama nchini pamoja na mazao mengine yatokanayo na mifugo.

Ulega amesema, mkakati wa kuendeleza sekta ya mifugo utaimarisha upatikanaji wa uhakika wa maji, malisho na vyakula bora vya mifugo, utahamasisha matumizi ya teknolojia za ufugaji wa kisasa, utaboresha afya, masoko, biashara na kuongeza thamani ya mazao ya mifugo.

Amesema, mkakati huo utaongeza uzalishaji mazao ya mifugo ikiwemo idadi ya ng'ombe wa maziwa kutoka 789,000 hadi milioni tatu, utaongeza uzalishaji maziwa kutoka lita bilioni 2.4 hadi lita bilioni 3.8 kwa mwaka.

Kwa mujibu wa Ulega, mkakati huo pia utaongeza uzalishaji wa nyama kutoka tani 679,992 hadi tani 882,100, utaongeza uzalishaji ngozi za ng'ombe, mbuzi na kondoo kutoka futi za mraba milioni 89 hadi futi za mraba milioni 98.9 na utaongeza uzalishaji mayai kutoka mayai bilioni 3.2 hadi mayai bilioni 6.4.

"Pia, mkakati unatarajiwa kuongeza upatikanaji wa huduma za ugani, kuongeza uzalishaji wa chanjo za mifugo zinazozalishwa hapa nchini, kuongeza usindikaji wa mazao ya mifugo, pamoja na kuongeza usambazaji wa teknolojia za ufugaji bora ili kufikia wafugaji wengi zaidi"amesema Ulega.

BARUA YA SAED KUBENEA KUJIUZULU CHADEMA YAIBUA MJADALA

Barua  ya Mbunge wa Ubungo, Saed Kubenea (Chadema), kuomba kujiuzulu imezua mjadala mzito ndani ya chama hicho.

Kubenea anadaiwa kuandika barua kuomba kujiuzulu nafasi ya Makamu Mwenyekiti wa Chadema Kanda ya Pwani, jambo ambalo linaonekana kuleta mgongano na kurushiana mpira.

Wakati mjadala huo ukishika kasi hadi sasa mbunge huyo hajakubali wala kukataa kuhusu barua hiyo aliyomwandikia Katibu Mkuu wa Chadema, Dk. Vicent Mashinji ambaye anasema pindi itakapomfikia ataifanyia kazi haraka.

Barua hiyo ya Agosti 28 mwaka huu ilianza kusambaa mitandaoni juzi, ambapo Kubenea alikuwa akitoa utetezi wake kutokana na kuandikiwa barua na na Katibu Mkuu wa chama hicho akitakiwa kujieleza kwanini asichukuliwe hatua za kinidhamu kwa kusababisha migogoro kupitia mitandao ya kijamii.

Katika barua hiyo yenye kumbukumbu MB/U/CDM/018/1  kwenda Ofisi ya Katibu Mkuu wa chama hicho, Kubenea alitakiwa kujibu tuhuma tano dhidi yake.

Akizungumza na waandishi wa habari Dar es Salaam jana, Dk. Mashinji alikiri kuona barua ya mbunge huyo kupitia mitandao ya kijamii, huku akiweka wazi kwamba pindi itakapomfikia ataifanyia kazi kwa haraka.

“Barua hiyo kama ambavyo umesema mwandishi ipo mitandaoni mimi bado sijaiona na kama nikiiona nitaifanyia kazi,’’alisema Dk. Mashinji.

Katika kile kinachooneka kuwa ni kukosekana kwa ufafanuzi wa kina Kubenea alikiri kupokea barua kutoka kwa Katibu Mkuu wa chama hicho ikimtaka kujieleza  kutokana na kikao cha Kamati Kuu (CC) iliyokutana Julai 7 na 8 mwaka huu.

Katika sehemu ya majibu ya Kubenea kwa Katibu Mkuu alieleza kukiri kupokea barua iliyoelekezwa kwake  Julai 19  mwaka huu 2018 yenye Kumb. Na. C/HQ/K/PWN/MG/30/8, kuhusu “KUJIELEZA KWA KATIBU MKUU”

TANZIA: JOHN GUNINITA WA CCM AFARIKI DUNIA

 

Aliyewahi kuwa mwenyekiti wa Chama cha Mapinduzi (CCM), mkoa wa Dar es Salaam John Guninita amefariki dunia.

Taarifa zinabainisha kuwa Guninita ambaye ameshawahi kuwa mwenyekiti wa Umoja wa Vijana wa CCM (UV-CCM), alikuwa akipatiwa matibabu katika Hospitali ya Taifa Muhimbili, jijini Dar es Salaam.

Taarifa za msiba huo zimethibitishwa na mdogo wake na marehemu, Gerald Guninita ambaye naye aliyewahi kuwa Mkuu wa Wilaya ya Kilolo wakati wa Uongozi wa Awamu ya Nne.

Miezi michache kabla ya uchaguzi mkuu wa 2015, Guninita alikuwa miongoni mwa makada wa CCM waliojiunga Chama cha Demokrasia na Maendeleo (CHADEMA) na kupewa cheo cha meneja wa kampeni.

Hata hivyo, mapema mwaka huu, marehemu Guninita aliripotiwa kurudi CCM huku akiomba radhi kwa hatua yake ya kukihama chama alichokitumikia kwa muda mrefu.

WALIOKUTWA NA MADINI KINYUME NA SHERIA WAHUKUMIWA MIAKA MITATU JELA AU FAINI MILIONI 24

Mahakama ya Hakimu Mkazi Kisutu imewahukumu miaka mitatu jela ama kulipa faini ya Sh. 24 milioni wafanyabiashara wawili wa madini baada ya kukiri kosa la kukutwa na madini ya Coloured Gemstones yenye thamani ya Dola za Kimarekani 1.8 milioni.

Pia mahakama hiyo imeamuru madini hayo yataifishwe. Hata hivyo, washtakiwa hao wameweza kuepuka kutumikia kifungo hicho baada ya kulipa faini hiyo.

Hukumu hiyo, imetolewa na Hakimu Mkazi Mwandamizi, Augustino Rwizire baada ya Wakili wa Serikali Mkuu, Joseph Pande kuwasomea mashtaka mawili washtakiwa hao ambapo walikiri makosa yao.

Baada ya kukiri makosa yao, Mahakama iliradhimika kuhamia maeneo ya Msasani Kinondoni Dar es Salaam ambapo vielelezo vya kesi hiyo vilikuwepo, ambapo kesi iliendeshwa na washtakiwa kutiwa hatiani. Washitakiwa hao ni Aazam Nazim (Raia wa India) na Ango Mbossa raia wa Tanzania.

Hakimu Rwizire hivyo alimtaka kila mshtakiwa kulipa faini ya Sh. 6 milioni kwa kila kosa ama kutumikia kifungo cha miaka mitatu jela katika kila kosa.

Kwa kuwa kila mshtakiwa anakabiliwa na mashtaka mawili hivyo kila mshtakiwa atapaswa kutoa faini ya Sh. 12 milioni iwapo atashindwa atatumikia kifungo cha miaka mitatu jela kwa kuwa vifungo hivyo vinaenda sambamba.

Washtakiwa wanadaiwa kutenda makosa yao kati ya January 2017 na June 2018 katika maeneo ya Misisiri A eneo la Mwananyamala.

Wanadaiwa kukutwa na madini aina ya Coloured Gemstones kilogramu 75,920.04 yenye thamani ya Dola za Kimarekani 1,795,687.87.

SERIKALI YAKUSUDIA KUONDOA KODI VIFAA VYA UONGEZAJI THAMANI MADINI

Na Asteria Muhozya, Arusha
Serikali imesema inaangalia uwezekano wa kuondoa kodi ya vifaa vya uongezaji thamani madini  ikilenga kuhamasisha shughuli za uongezaji thamani madini kufanyika nchini.

Hayo yamebainishwa na Naibu Waziri wa Madini Stanslaus Nyongo wakati akijibu swali la mwanafunzi wa Kituo Cha Jemolojia Tanzania (TGC) Rojer Mpele aliyeiomba Serikali kupitia Naibu Waziri kuangalia namna ya kupunguza kodi ya vifaa hivyo ili  kuwasaidia wanafunzi wanaojifunza ukataji na ung’arishaji madini katika kituo hicho kuweza kujiajiri baada ya kuhitimu .

Nyongo ameongeza kuwa, tayari Serikali imeanza kufanya taratibu za kupeleka maombi  kuhusu jambo hilo katika Mamlaka husika ili liweze kufanyiwa kazi kwani litahamaisha uwekezaji wa viwanda vya uongezaji thamani madini nchini ikiwemo kuongeza wigo wa ajira na mapato kupitia sekta ya madini.

Naibu Waziri Nyongo amekitembelea kituo hicho kilichopo jijini Arusha kwa lengo la kujifunza shughuli zinazofanyika kituoni hapo. Kituo cha TGC kipo chini ya Wizara ya Madini, kinatoa mafunzo ya ukataji na ung’arishaji madini ya vito lengo likiwa ni kuongeza thamani madini.

Ameongeza kuwa suala la uongezaji thamani madini nchini ni jambo ambalo  ni kipaumbele cha serikali kutokana na Mabadiliko ya Sheria ya Madini ya Mwaka 2010 na Maboresho yake ya Mwaka 2017 na kwamba tayari serikali imezuia usafirishaji wa madini ghafi nje ya nchi na badala yake inahamasisha shughuli hizo kufanyika hapa hapa nchini kwa kuwa, zitawezesha kuleta ujuzi, ajira, mapato zaidi ya serikali na kuyaongezea thamani madini hayo nchini kabla hayajasafirishwa nje ya nchi.

“Bado Wizara inaweka msisitizo wa shughuli za uongezaji thamani zifanyike hapa nchini. Kwa hiyo napenda kuwaambia ninyi vijana mnajifunza kitu ambacho ni kipaumbele kwa wizara na serikali,” amesisitiza Naibu Waziri.

Aidha, Naibu Waziri amesema kuwa, serikali kupitia Mradi wa Usimamizi Endelevu wa Rasilimali Madini (SMMRP) unaotekelezwa  chini ya wizara kutokana na mkopo wa Benki ya Dunia, tayari umeagiza vifaa mbalimbali kwa ajili ya kuanzisha karakana ya shughuli za uongezaji thamani madini katika kituo hicho, karakana hiyo inalenga kutumiwa na wahitimu wa kituo husika ili kwawezesha kujiajiri pindi wanapohitimu mafunzo yao.

“Watakaohitimu hapa watalipia gharama ndogo sana za mashine watakazokuwa wakizitumia kufanya kazi zao katika karakana hiyo. Lakini pia, ili kuboresha shughuli za karakana hiyo, tutaendelea kujifunza kwa nchi nyingine namna wanavyoendesha karakana zao,” ameongeza Nyongo.

Katika jitihada za kuendelea kukiboresha kituo husika, Naibu Waziri Nyongo amemtaka Mratibu wa Kituo hicho, kuandaa  Mpango Mkakati wa namna ya kukiboresha na kukitanua kituo hicho ili kiweze kuwa bora na mfano kwa nchi nyingine barani Afrika.

“ Imefika wakati ambapo tunataka TGC kuwa chombo ambacho kinatoa ujuzi wa hali ya juu katika uongezaji thamani madini. Lazima tutoe mafunzo kwa vijana wa kitanzania  na tuendelee kuangalia namna ya kuleta ujuzi au kwa kuwapeleka vijana wetu kujifunza kwa wenzetu na baadaye wawe wakufunzi katika kituo hiki.

Vilevile, Naibu Waziri Nyongo amesisitiza kuwa, Serikali kupitia wizara ya Madini itaendelea kusimamia kwa karibu kuhakikisha kuwa inatekeleza na kutimiza malengo ya uanzishwaji wa kituo hicho. “Lazima ifike mahali kituo kitoe mafunzo kwa jinsi ilivyokusudiwa, ameongeza Nyongo.

Kwa upande wake,  Kaimu Mratibu wa Kituo cha TGC, Eric Mpesa amesema kuwa, kituo hicho ni kituo pekee Afrika Mashariki kinachoendeleza taaluma ya uongezaji thamani madini ya vito na miamba.

Pia, amesema kuwa, kituo kinakusudia kutoa mafunzo ya Diploma ya Gem Jewelly technology ambapo mhitimu katika mwaka wa Kwanza atapatiwa cheti cha NTA Level 4, mwaka wa pili NTA Level 5 na mwaka wa tatu NTA Level 6.

“Kwa kuwa mafunzo yanayotolewa katika kituo hiki ni ya muda mrefu na mfupi, taratibu za kukisajili kwenye Baraza la taifa la Elimu ya Ufundi (NACTE) zilifanywa na kwa sasa kituo kimepata usajili wa kudumu wenye Na. REG/SAT/003,” ameongea Mpesa.

Mpesa ameongeza kuwa, wizara iliamua kuwekeza katika Kituo hicho kwa lengo la kutoa mafunzo ya kuongeza thamani madini ya vito kwa wadau na wajasiliamali wa madini hayo hapa nchini.

Ameongeza kuwa, malengo mengine ni pamoja na kukuza na kuendeleza ujuzi na ufahamu wa kutambua madini ya vito, kuongeza thamani kipato na ajira kwa watanzania.

“ Hivi sasa kituo hicho kinatoa mafunzo ya muda mfupi ya ukataji na unga’rishaji wa madini ya vito na kinaendesha shughuli za uchongaji wa mawe ya miamba kwa kutengeneza  wanyama, ndege, samaki na vitu mbalimbali vya mapambo, amesema Mpesa.

Kituo cha Jemolojia Tanzania (Tanzania Gemological Center -TGC) kilianzishwa mwaka 2003 wakati serikali ikitekeleza mradi wa Maendeleo Sekta ya Madini ( Mineral Sector Development Technical Assistance – MSD TA) ambao ulitekelezwa kati yam waka 1994 na 2005 kwa mkpo kutoka benki ya Dunia. Wakati huo lengo la kuanzissha kituo hicho lilikuwa ni kutekeleza Sera ya Madini ya Mwaka 1997 kuhusu uongezaji thamani madini nchini kwa kuanzia na kutoa mafunzo ya uchongaji wa vinyago vya miamba.

WAZIRI LUKUVI AAGIZA KUFUKUZWA KAZI AFISA ARDHI WA WILAYA YA MONDULI

Waziri wa Ardhi, Nyumba na Maendeleo ya Makazi Mhe. William Lukuvi ameagiza kufukuzwa kazi afisa ardhi wa wilaya ya Monduli bwana Kitundu Mkumbo kwa kukiuka sheria na taratibu za utoaji wa hati miliki za kimila.

Waziri Lukuvi ametoa agizo hilo mbele ya wakazi wa kijiji cha Engarooji wilayani Monduli mkoani Arusha ambao wamekua katika mgogoro wa ardhi kwa muda mrefu hali iliyowalazimu kugawanyika katika makundi mawili yasiyoelewana, Waziri Lukuvi amefafanua kuwa mwenye mamlaka ya kumilikisha mtu ardhi zaidi ya hekari 50 ni Mhe. Rais wa Jamhuri ya Muungano wa Tanzania pekee.

“Afisa huyu wa ardhi ambaye japo hapo awali mlishawahi kumsimamisha kazi kwa makosa mengune kama haya, lakini  kwa sasa makosa haya ni makubwa sana na sasa afukuzwe kazi, haiwezekani amilikishe hekari zaidi ya 1,500 kinyume na sheria” Alisema Mhe. Lukuvi.
 
Katika hatua nyingine Waziri Lukuvi amezifuta hati zote za kimila zilizotolewa na afisa ardhi huyo kwasababu zimetolewa kinyume na utaratibu kwa mujibu wa sheria ya ardhi ya mwaka 1999 ambayo hairuhusu kutoa hatimiliki za kimila zaidi ya hekari 50 bila idhini ya Rais.

Miongoni mwa watu waliomilikishwa maeneo makubwa kubwa katika kijiji cha Engarooji wilayani Monduli ni Paulo Ndari mwenye hekari 716, Lekashu Ng’ene mwenye hekari 301 na Salimu Orkoskos mwenye hekari 268 ambazo zote pamoja na nyingine Waziri Lukuvi amezifuta.