DAKTARI MMOJA WAGONJWA 30,000 TANZANIA

Waziri wa Mawasiliano, Sayansi na Teknolojia, Profesa Makame Mbarawa.

 Daktari mmoja nchini Tanzania, anahudumia watu 30,000 (1:30,000), utafiti wa Shirika la Afya Duniani (WHO), umeonyesha.
Hata hivyo, takwimu hizo zipo mbali mno na uwiano uliopendekezwa na WHO wa daktari maalum mmoja kuhudumia watu 1,000.
Taarifa ya Hospitali ya Apollo jana ilisema kutokana na ukuaji wa haraka wa idadi ya watu nchini, kwa ujumla uwiano huo haujabadilika katika kipindi cha miaka mitano iliyopita.
Kutokana na uhaba huo unaojionyesha, ufumbuzi ni kuongeza idadi ya madaktari katika maeneo mbalimbali ya nchi.
Hata hivyo, taarifa ilisema jambo hilo linaonekana kama litakuwa mkakati wa muda mrefu nchini na hivyo ufumbuzi wa haraka ni wa kutumia teknolojia kama vile telemedicine katika maeneo hayo.
Ilifafanua kuwa hatua ya kutumia teknolojia ya telemedicine, itaruhusu maeneo ya mbali zaidi kama vile vijijini kuwa na upatikanaji wa mtaalam katika hospitali atakayetoa ushauri na matibabu kwenye hospitali na kliniki hizo bila kusafiri umbali mrefu.
NIPASHE