KUTOKA WAKALA WA VIPIMO(WMA):SERIKALI KUPITIA WAKALA WA VIPIMO YAHAKIKISHA WANANCHI WANAPATA HUDUMA BORA ZA VIPIMO

 

Mh.Rais wa Jamhuri ya Muungano wa Tanzania Dkt. Jakaya Mrisho Kikwete akimkabidhi cheti  Afisa Mtendaji Mkuu wa Wakala wa Vipimo Magdalena Chuwa kwa kutambua mchango wa taasisi katika kufanikisha kongamano la maadhimisho ya miaka 10 ya Tume ya Utumishi wa Umma.

Ndugu msomaji, jana tulizungumzia tatizo la Lumbesa, hebu leo tuangalie ufumbuzi wake kama anavyoeleza Afisa Mtendaji wa WMA, Magdalena Chuwa.. endelea.

Kwa mujibu wa Chuwa , Wakala umependekeza mikakati mbalimbali ambayo inaweza kusaidia kupunguza au kuondoa kabisa tatizo la ufungashaji batili wa bidhaa kwa mtindo wa Lumbesa. Mojawapo ya mikakati hiyo ni kuwepo kwa faini kubwa kwenye sheria mpya ya vipimo ili iweze kuzuia ufungashaji huu batili wa ambao humsababishia mkulima umasikini badala ya kumnufaisha .

Mkakati mwingine ni utoaji wa elimu kwa umma katika maeneo mbalimbali ya nchi yetu hususan mikoa ya Iringa na Mbeya ambako kuna uzalishaji mkubwa wa mazao mbalimbali.

“Hivi sasa Wakala wa Vipimo umekuwa ukipata fursa ya kutoa elimu kwa njia ya mada kuhusu majukumu yake,katika vikao vya RCC huko mikoani.Mada hizo husaidia viongozi wa juu mikoani kufahamu kwa undani zaidi madhara ya vipimo batili kama Lumbesa,Visado na Madebe kwa wafanyabiashara na wakulima,”

Chuwa anasema kuwa licha ya kuendelea kutoa elimu kwa viongozi wa juu mikoani,pia Wakala unaendelea na mkakati wa kuelimisha wananchi wa ngazi za chini kabisa kwa msaada wa Wakuu wa Wilaya na Wakuu wa Mikoa.

“Tunaimani kuwa elimu ndiyo suluhisho la uhakika kwa changamoto za matumizi ya vipimo batili nchini ambavyo husababisha wakulima na wajasiriamali kuendelea kuwa masikini siku hadi siku” aliongeza Chuwa. ...Tutaendelea Jumatatu.