WACHUUZI WA SAMAKI WETE BANDARINI WAGOMA KUREJEA NDANI YA SOKO

Na Masanja Mabula –Pemba

 WACHUUZI  wa samaki katika soko la Bandarini Wete , wamegoma kurejea ndani ya soko hilo wakiutaka uongozi wa Baraza la Mji Wete kuhakikisha unarejesha huduma muhimu ndani ya soko hilo ikiwemo maji pamoja na vyoo.

Wamesema kwamba uwamuzi wa kutoka na kuanza kuuza samaki nje ya soko ni kutokana na kuharibika kwa miundo mbinu ya maji ndani ya soko , jambo ambalo linahatarisha usalama wa maisha yao na wateja wanaokwenda kupata mahitaji ya kila siku .

Wakizungumza na kamati ya kusimami mwendendo wa wachuuzi wa samaki  iliyoundwa na Mkuu wa Wilaya ya Wete , walisema hawako tayari kurejea ndani ya soko hilo , hadi uongozi wa Baraza la Mji utakapojipanga kurejesha huduma muhimu za kijamii .

Mwenyekiti wa Kamati ya wavuvi ambaye pia  ni dalali wa samaki sokoni hapo Mohamed Kombo alisema endapo huduma hizo zitarejeshwa ndani ya soko hilo , wachuuzi wote watarejea na kuuza samaki wao kwani watakuwa na usalama wa maisha yao .

“Uongozi wa Baraza unmekusudia kutudhalilisha , hili sio soko , maji hakuna na vyoo hakuna isiotoshe lipo chini yam nada unafikiri nani atakayekuja kununua sakami kwa mchuuzi wakati mnada uko hapa hapa ? ”alihaoji .

Naye Hossein Sharif Mchuuzi wa samaki na dalali , alisema uwamuzi wa kuhama kuuza samaki ndani ya soko ni kuwapunguzia kazi wanafanyakazi wanaosafisha ndani ya soko , kwani wanapata usumbufu kufuata huduma kwa kichwa kwa ajili ya kusafisha baada aya saa za kazi .

Alisema awali Uongozi wa Baraza ulifanikisha kuunganisha huduma ya maji kwa muda , lakini huduma hiyo ilidumu kwa muda wa wiki mbili na kukatwa  , kuacha soko likiwa katika hali tete hasa kipindi hichi cha magonjwa ya mripuko .

Kwa upande wake Khatib Said Kombo aliiambia kamati hiyo kwamba vyoo vipo mbali na soko na haviko katika hali nzuri , hivyo ni vyema kuangaliwa upya na kufanyiwa marekebisho ili viweze kutumika .

Akijibu malalamiko hayo Mkurugenzi wa Baraza la Mji Wete , Mgeni Othman Juma alisema baadhi ya sababu zilizotolewa na wachuuzi hao sio za msingi na kwamba ambazo ni za msingi aliahidi kuzipatia ufumbuzi wa haraka .

“Tayari uongozi wa Baraza umelipa fedha kwa mamlaka ya Maji (ZAWA) Wilaya  ya Wete kwa ajili ya kurejesha huduma hiyo ndani ya soko , na huduma hii itarejea ndani ya kipindi cha wiki moja , lakini wakati tunasubiri hilo kufanikishwa tunawaomba wachuuzi warejea ndani ya soko ”alisisitiza.

Hata hivyo uchunguzi uliofanywa na mwandishi wa habari hizi umebaini kwamba Mamlaka ya Maji Zanzibar (ZAWA)  Wilaya hiyo ilifikia uwamuzi wa kuikata huduma ya maji katika soko hilo kwa kuwa yalikuwa hayatumiki na yalisababisha miundo mbinu kupasuka baada ya kuzidiwa na presha yake