MZEE WILLY CHIWANGO AFARIKI DUNIA

Marehemu Willy Chiwango (kushoto) enzi za uhai wake akiwa na Mtendaji Mkuu wa BIN ZUBEIRY SPORTS - ONLINE, Mahmoud Zubeiry (kulia) MWANDISHI nguli wa habari za michezo na burudani Tanzania, Willy Chiwango amefariki dunia. Taarifa kutoka kwa familia ya marehemu zinasema kwamba Willy Chiwango aliyewahi kushinda tuzo ya Mwandishi Bora wa Michezo nchini amefariki usiku wa kuamkia leo. Na imeelezwa marehemu alikuwa anasumbuliwa na maradhi, ambayo familia yake itatoa taarifa zaidi baadaye. Hadi anakutwa na umauti, Chiwango alikuwa anafanya kazi magazeti ya Serikali, Daily News na Habari Leo. Lakini enzi zake, marehemu alifanya kazi katika vyombo mbalimbali vya habari nchini, ikiwemo shirika la IPP Media. Bwana ametoa, bwana ametwaa. Mungu amfanyie wepesi huko alikotangulia, mbele yake, nyuma yetu. Buriani Willy

Chiwango (katikati) akiwa na magwiji wenzake wa habari za michezo enzi za uhai wake. Kulia ni Mwina Kaduguda na kushoto Salid Said