DALADALA RUKSA KUSAFIRISHA ABIRIA MIKOANI

Dar es Salaam. Mamlaka ya Usafirishaji wa Majini na Nchi Kavu (Sumatra) imeruhusu mabasi ya usafiri jijini Dar es Salaam, maarufu kama daladala, kufanya safari ndefu kwenda mikoa ya kaskazini kutokana na mahitaji makubwa ya huduma hiyo katika kipindi cha sikukuu za Krismasi na Mwaka Mpya.

Mkurugenzi mkuu wa Sumatra, Gilliard Ngewe alisema jijini hapa jana kuwa wamelazimika kuruhusu daladala hizo kukidhi mahitaji ya usafiri kwenda mikoa ya Arusha na Kilimanjaro katika kipindi hiki.

Alisema wamefikia hatua hiyo baada ya kuona wingi wa abiria wanaokwenda kwenye mikoa hiyo kulinganisha na mabasi yaliyopo.

Pia, alisema Sumatra ipo katika hatua za mwisho kuongeza magari makubwa matano yanayofanya safari za mikoa mingine ili kukabiliana na hali hiyo.

“Kwa kweli hatukupanga kabisa kutumia hizo daladala na ndiyo maana zimeanza kuruhusiwa leo (jana) kuanzia saa 4:00 asubuhi na zinatoza nauli ile ile iliyopangwa,” alisema Ngewe.

Baadhi ya daladala zikiwamo zenye usajili wa kufanya safari zake kati ya Mbagala Rangi Tatu na Makumbusho zilikuwa zikikaguliwa na kupewa kibali na maofisa wa Sumatra kabla ya kuanza kubeba abiria wa mikoa hiyo.

Kaimu katibu mkuu wa Chama cha Kutetea Abiria Tanzania (Chakua), Gordwin Ntongeji alisema hali hiyo ya uwingi wa abiria ilianza kujitokeza mwishoni mwa wiki iliyopita.

“Jumamosi na Jumapili abiria wa mikoa hiyo walikuwa wengi na baadhi yao walikosa usafiri, ndio maana unawaona leo hii (jana) abiria wanakimbilia katika hizo daladala ili kuwahi sikukuu za Krismas na Mwaka mpya,” alisema Ntongeji.

Mmoja wa abiria hao, Julius Peter aliishukuru Sumatra kwa uamuzi huo akisema kuwa amehangaika kwa siku ya tatu kutafuta usafiri wa kwenda Arusha kwa kuwa kila basi alilojaribu kukata tiketi, aliambiwa limejaa.CHANZO MWANANCHI