MARUDIO YA UCHAGUZI WA SERIKALI ZA MITAA: CCM, UKAWA WAKABANA KOO!

Dar/mikoani. Matokeo ya uchaguzi wa marudio wa viongozi wa serikali za mitaa uliofanyika juzi yameonyesha kuwa pamoja na CCM kuendelea kuongoza, chama hicho tawala kimepoteza viti katika maeneo kadhaa.

Kabla ya uchaguzi wa juzi, CCM ilinyakua zaidi ya asilimia 70 ya viti vyote baada ya uchaguzi wa kwanza uliofanyika Desemba 14, lakini vyama vya upinzani, vikiongozwa na Chadema vilikusanya viti vingi kwenye maeneo ambayo havikuwahi kupata viongozi wa mitaa, huku vikiongeza idadi kwenye maeneo ambayo vilikuwa na viti vichache.

Sura hiyo imeendelea kujionyesha kwenye matokeo ya uchaguzi uliofanyika Jumapili iliyopita.

Habari kutoka mikoa ya Dar es Salaam, Kigoma, Tabora, Geita na Kilimanjaro pamoja na wilaya za Sengerema, Mkuranga na Kilombero, zinaeleza kuwa CCM imepata mitaa na vijiji 258, CUF 39, Chadema 85 na ACT mtaa mmoja. Kwa matokeo hayo pamoja na yale yaliyotangazwa Desemba 17, mwaka huu na Ofisi ya Waziri Mkuu, Tamisemi, CCM sasa itakuwa imejipatia jumla ya mitaa na vijiji 9,666 wakati upinzani kwa ujumla wao umegawana nafasi 3,336.

Kwa mujibu wa matokeo hayo ya awali, CCM ilipata vijiji na mitaa 9,406 na wapinzani kwa pamoja walikuwa wamegawana 3,211.

Uchaguzi wa marudio

Katika Wilaya ya Kinondoni jijini Dar es Salaam, uchaguzi huo ulirudiwa katika mitaa 15, ambako CCM imeshinda mitaa sita, Chadema na CUF mitaa minne kila kimoja.

Kwa ujumla CCM imeshinda kwa asilimia 72 katika nafasi ya mwenyekiti wa mtaa, Chadema asilimia 14 na CUF asilimia 11. CCM imepata pigo katika uchaguzi uliofanyika katika mitaa mitano ya Manispaa ya Moshi baada ya kuambulia kiti kimoja tu, huku vingine vikichukuliwa na Chadema.

Hata hivyo, chama hicho kimeongoza katika uchaguzi huo mkoani Kigoma kilikoshinda katika maeneo mengi. Mwenyekiti wa Chadema Wilaya ya Kasulu, Rajabu Bujoro alisema vyama vinavyounda Ukawa vilishindwa kuungana na hivyo kutoa mwanya kwa CCM kushinda.

Mkoani Tabora, hadi sasa CCM imechukua vijiji 31 kati ya 71 vilivyofanya uchaguzi huo wa marudio, CUF vijiji vitatu, Chadema 10 na ACT kimoja. Katika uchaguzi wa vitongoji, CCM imechukua vitongoji 147 kati ya 290, Chadema 30, CUF saba na ACT vitatu.