QATAR YATANGAZA NAFASI ZA AJIRA KWA WATANZANIA

Doha, Qatar. Serikali ya Qatar imesema iko tayari kuajiri Watanzania katika nyanja mbalimbali za kitaalamu kwa kuwa taifa hilo lina uhaba wa wataalamu katika maeneo mengi.

Hayo yako katika mazungumzo yaliyofanyika jana kati ya Waziri Mkuu, Mizengo Pinda na Waziri Mkuu wa Qatar, Sheikh Abdullah Nasser Al Thani ofisini kwake mjini Doha, Qatar.

Waziri Mkuu Pinda yuko katika ziara ya kuzitembelea nchi za Falme za Kiarabu. Aliwasili juzi usiku na kupokewa kifalme na mwenyeji wake huyo.

Akizungumza baada ya mkutano, Pinda alisema Serikali ya Qatar imesema iko tayari kuwapa Watanzania ajira katika maeneo mbalimbali.

“Kimsingi, waziri mkuu amekubali Watanzania kuja kufanya kazi Qatar kwa kuwa hapa wengi ni wageni, tusubiri baada ya mkataba tutakaotiliana saini wa kuwaleta Watanzania hapa,” alisema.

Alisema kuna baadhi ya Watanzania tayari wameshaingia kwenye soko la ajira Qatar, lakini idadi haitoshi kutokana na ukweli kuwa Qatar kuna kazi nyingi.

“Pia tutawekeana utaratibu wa kubadilishana wataalamu ili pande zote mbili zifaidike,” alisema Pinda.

“Waziri Mkuu ameniambia wao wana gesi lita za ujazo trilioni 900, sisi Tanzania ni trilioni 53, sasa nimeomba tushirikiane hapa kwa kuwa wao tayari ni wazoefu,” alisema.

Alisema kuwa Qatar ambayo ni ya 11 kwa utajiri duniani, pamoja na kwamba ni nchi ndogo yenye idadi ya watu milioni 2.2, wana uwezo mkubwa eneo la mafuta na gesi.

Pinda jana alitarajia kuwa na mazungumzo na Naibu Waziri wa Nishati, Waziri wa Masuala ya Uchumi, Waziri wa Vitegauchumi, Waziri wa Miundombinu na Usafirishaji na Waziri wa Kazi na Maendeleo ya Jamii.

Baadaye usiku, alitarajiwa kukutana na Watanzania wanaoishi na kufanya kazi Qatar na kisha kutembelea Bandari ya Qatar na kufanya mazungumzo na maofisa wa bandari hiyo.