UTAPELI WA AJIRA ZA POLISI WASHIKA KASI.

Kamanda wa Polisi Mkoa wa Kilimanjaro, Wilbroad Mtafungwa
Vijana 11 waliokuwa na shauku ya kujiunga na Chuo cha Polisi Moshi (MPA) wamejikuta wakitapeliwa kati ya Sh. milioni moja hadi milioni 1.5 kila mmoja, baada ya kulaghaiwa na mmoja wa askari mgambo mjini humo kuwa atawapatia nafasi ya kujiunga na chuo hicho.

Habari za uhakika zilizopatikana mjini hapa jana na baadae kuthibitishwa na Kamanda wa Polisi Mkoa wa Kilimanjaro, Wilbroad Mtafungwa na Mkuu wa chuo hicho, Kamishna Mwandamizi Matanga Mbushi, zinaeleza kwamba, vijana waliotapeliwa wanatokea mkoa wa Mbeya.

Kamanda Mutafungwa alisema jana kwamba, Jeshi la Polisi halijatangaza nafasi za mafunzo hayo na kwamba mtuhumiwa aliyefanya utapeli huo ambaye ni askari mgambo mkazi wa Mbeya, amekamatwa mjini Moshi na anashikiliwa na polisi kwa mahojiano kabla ya kufikishwa mahakamani.