PROF NTALIKWA AZINDUA BODI YA STAMICO AITAKA KUHAKIKISHA STAMICO INAENDESHWA KWA FAIDA

Katibu Mkuu wa Wizara ya Nishati na Madini Prof. Justin Ntalikwa (mbele) akiongoza kikao cha uzinduzi wa Bodi ya Shirika la Madini la Taifa (STAMICO) uliofanyika jijini Dar es Salaam.

Naibu Katibu Mkuu wa Wizara ya Nishati na Madini anayeshughulikia masuala ya madini Prof James Mdoe, akielezea historia ya Shirika la Madini la Taifa (STAMICO) katika uzinduzi huo uliofanyika jijini Dar es Salaam.

Baadhi ya wajumbe wa Bodi Mpya ya Shirika la Madini la  Taifa (STAMICO)  wakifuatilia kwa makini hotuba ya  uzinduzi  wa bodi  hiyo iliyokuwa inatolewa na Katibu Mkuu wa Wizara  ya Nishati na Madini Prof. Justin Ntalikwa.(hayupo pichani).

Katibu Mkuu wa Wizara  ya Nishati na Madini Prof. Justin Ntalikwa (mbele kulia) akimkabidhi vitendea kazi mmoja wa wajumbe wa  Bodi ya  Shirika la Madini la  Taifa (STAMICO)   Dk. Lightness Mzava, (mbele kushoto) mara baada ya uzinduzi wa bodi hiyo  uliofanyika jijini Dar es Salaam

Katibu Mkuu wa Wizara  ya Nishati na Madini Prof. Justin Ntalikwa ( wa tatu kutoka kushoto waliokaa mbele) Naibu Katibu Mkuu wa Wizara ya  Nishati na Madini anayeshughulikia masuala ya madini  Prof James Mdoe ( wa pili kutoka kushoto waliokaa mbele)  wakiwa katika picha ya pamoja na wajumbe wa Bodi ya  Shirika la Madini la  Taifa (STAMICO) mara baada ya kumalizika kwa uzinduzi  huo.

……………………………………………………………………………

Na Greyson Mwase, Dar es Salaam.

Katibu Mkuu wa Wizara ya Nishati na Madini Prof. Justin Ntalikwa amezindua bodi  ya wakurugenzi ya  Shirika la Madini la  Taifa (STAMICO) na kuitaka  bodi hiyo kuhakikisha kuwa shirika hilo linaendeshwa kibiashara na kuchangia katika ukuaji wa sekta ya madini.

Bodi hiyo iliyoteuliwa hivi karibuni na  Waziri wa Nishati na Madini Prof. Sospeter Muhongo  inaundwa na wajumbe watano ambao ni pamoja na Abdalah  Musa, Dkt. Coretha Komba, Felix  Maagi, Dkt. Lightness Mnzava, John  Seka chini ya Mwenyekiti wake  Balozi  Alexander Muganda.

Profesa Ntalikwa alisema kuwa STAMICO ni  Taasisi ya Serikali  iliyopewa jukumu  la kushiriki katika uwekezaji  kwenye sekta ya madini kwa niaba ya serikali  hivyo bodi ina wajibu  mkubwa wa kusimamia shirika kwa manufaa ya  taifa kwa kuhakikisha kuwa miradi yote iliyo chini ya shirika hilo inaendelezwa na kusimamiwa ipasavyo ili kuipatia Serikali manufaa mbalimbali  ikiwepo  gawio   katika migodi ya  ubia.

Aliendelea kusema kuwa kwa sasa STAMICO inaiwakilisha serikali  katika miradi mbalimbali  ikiwa ni pamoja na Mgodi wa Tanzanite unaomilikiwa kwa ubia kati  ya  Tanzanite One Mining Limited asilimia  50 na STAMICO asilimia 50; Mgodi  wa Dhahabu wa Buckreef unaomilikiwa kwa ubia wa STAMICO kwa asilimia  45 na TANZAM2000 kwa asilimia 55.

Alitaja miradi mingine kuwa ni pamoja Mgodi wa STAMIGOLD wa Biharamilo unaomilikiwa kwa asilimia 100 na kampuni  tanzu  ya STAMIGOLD; Mgodi wa Makaa  ya Mawe wa Kiwira kwa  asilimia 100 na Mradi wa Dhahabu wa Buhemba kwa  asilimia  100.

Miradi  mingine ni ya ununuzi wa madini ya bati (tin) kupitia kampuni  tanzu ya Kyerwa Tin Company Limited na miradi ya utafutaji wa madini  kwenye leseni mbalimbali  za utafutaji wa madini zipatazo 49  zinazomilikiwa na shirika.

Aliongeza kuwa shirika linatoa huduma za uchorongaji na ushauri  kwenye masuala ya madini  pamoja na kusaidia wachimbaji wadogo hasa kwenye masuala ya kiufundi.

Alisisitiza kuwa  kutokana na miradi mikubwa ya STAMICO, bodi  ina kazi kubwa ya kuhakikisha kuwa miradi yote ya shirika  hilo  inaendelezwa kwa  faida

“Katika kusimamia shirika, mtazamo unatakiwa uwe ni wa kujiendesha siku za usoni kutokana na kuendesha miradi yenye  faida na kuleta gawio  serikalini. Alisema Prof. Ntalikwa

Aliendelea kusema kuwa ni vyema shirika  liendeshwe kwa mtizamo wa kibiashara ili liweze kushindana na wadau wengine wanaowekeza katika sekta ya madini  na kuleta manufaa yenye  tija kwa taifa.

Aliwataka wajumbe wa bodi hiyo  kupitia  sera, sheria na miongozo mbalimbali katika sekta ya madini  ili waweze kuisimamia STAMICO kwa ufanisi pamoja na kuhakikisha  kuwa mikataba mbalimbali ambayo  shirika  linaingia  inakuwa ni yenye manufaa.

Alisisitiza kuwa pale inapowezekana bodi inatakiwa kuboresha mikataba iliyopo kwa kukaa na wabia ili pande zote ziweze kunufaika na manufaa yatokanayo na miradi husika.

Wakati huohuo akizungumza katika uzinduzi huo Naibu Katibu Mkuu wa  Wizara ya Nishati na Madini anayeshughulikia masuala ya madini  Prof James Mdoe alisema kuwa  STAMICO ina historia ndefu  tangu kuanzishwa kwake miaka  ya  1970 ambapo  lilielekea kufa lakini lilirudi  kwenye hadhi yake mwaka  2013

Alisema kuwa   shirika la STAMICO likisimamiwa ipasavyo, linaweza kuwa na mchango mkubwa katika ukuaji wa uchumi wa nchi kupitia sekta ya madini.

“  Shirika hili lina miradi mingi na madini  yapo mengi ambapo ninaamini kuwa iwapo  itasimamiwa ipasavyo  shirika lina  mchango mkubwa sana wa kuifanya  sekta ya madini   kuchangia kwa asilimia kubwa katika pato la taifa,” alisema Prof. Mdoe.

Naye Mwenyekiti wa Bodi  hiyo Balozi  Alexander Muganda, akizungumza mara baada ya uzinduzi huo, alisema kuwa anamshukuru Waziri wa Nishati na Madini Profesa Sospeter Muhongo kuwa na imani na bodi  hiyo na kuahidi kufanya kazi kwa bidii katika kuhakikisha kuwa  shirika hilo linapiga hatua kubwa katika mchango wake kwenye pato la  taifa.

Alisema kuwa bodi yake imejipanga kuhakikisha kuwa shirika linasimamiwa kwa ufanisi mkubwa ili STAMICO iweze kuleta mabadiliko makubwa ya kiuchumi.