BARABARA YA NAMTUMBO-TUNDURU KUKAMILIKA SEPTEMBA.

Imeelezwa kuwa Barabara ya Namtumbo-Tunduru yenye urefu wa km 193 inatarajiwa kukamilika septemba mwaka huu.

Kauli hiyo imetolewa na Waziri wa Ujenzi, Uchukuzi na Mawasiliano Profesa Makame Mbarawa wakati akikagua maendeleo yaliyofikiwa katika mradi wa ujenzi huo ulioanza mwaka 2014.

Amesema kuwa ujenzi wa barabara ya Namtumbo-Tunduru ambao umegawanyika katika sehemu tatu ambazo ni Namtumbo-Kilimasera yenye urefu wa Km 60.7, Kilimasera-Matemanga yenye urefu wa Km 68.2 na Matemanga-Tunduru yenye urefu wa Km 58.7 ujenzi wake uko katika hatua nzuri.

“Nimekagua zaidi ya kilomita 300 na nimeridhishwa na hatua iliyofikiwa katika miradi hii, nawaomba muendelee kuzingatia viwango vilivyowekwa na Serikali itaendelea kuwapa miradi mingine”, amesema Prof. Mbarawa.

Kwa upande wake Kaimu Meneja wa Wakala wa Barabara nchini (TANROADS) mkoa wa Ruvuma Eng. Lazeck Alinanuswe amesema kuwa sehemu ya ujenzi wa barabara ya Namtumbo-Kilimasera Km 60.7 mkandarasi wa barabara hiyo amekamilisha kwa asilimia 90 na baadhi ya sehemu zingine ujenzi unaendelea.

“Ujenzi wa barabara unaendelea vizuri hadi sasa zimebaki asilimia kumi ili ukamilike kwa asilimia mia moja na kuanza kutumiwa na wananchi”, amesisitiza Eng. Alinanuswe.

Ujenzi wa Barabara ya Namtumbo hadi Tunduru yenye urefu wa Km 193 inajengwa kwa fedha za Serikali ya Tanzania kushirikiana na Shirika la maendeleo la Japan (JICA), na Benki ya maendeleo ya Africa (AfDB).

Imetolewa na Kitengo cha Mawasiliano Serikalini, Wizara ya Ujenzi, Uchukuzi na Mawasiliano.