TAMKO KUHUSU MWENENDO WA UGONJWA WA KIPINDUPINDU NCHINI, PAMOJA NA MLIPUKO WA UGONJWA WA POLIO LILILOTOLEWA NA WAZIRI WA AFYA MHE.UMMY MWALIMU

Wizara ya Afya, Maendeleo ya Jamii, Jinsia, Wazee na Watoto inaendelea na utaratibu wa kutoa tahadhari kwa wananchi na maelekezo ya hatua za kuchukua katika kukabiliana na mlipuko wa ugonjwa wa Kipindupindu. Huu ni mwendelezo wa utoaji wa taarifa ya kila wiki, kuhusu mwenendo wa ugonjwa huu kama tulivyoahidi. Hadi kufikia tarehe 18 Julai 2016, jumla ya wagonjwa 22,306 wametolewa taarifa, na kati yao, watu wapatao 345 wamepoteza maisha, tangu ugonjwa huu uliporipotiwa mnamo mwezi Agosti 2015

Takwimu zinaonyesha kuwa, katika wiki hii inayoishia tarehe 18 Julai 2016, idadi ya wagonjwa wa Kipindupindu walioripotiwa ni 54 na hakuna aliyepoteza maisha.  Wagonjwa wote waliotolewa taarifa walitoka mkoa wa Morogoro (Morogoro mjini 31, Ulanga 20) na Arusha (Arusha mjini 3). Ikilinganishwa na wiki iliyopita idadi ya wagonjwa imeongezeka ambapo kulikuwa na idadi ya wagonjwa 38 bila kifo.

Ninawapongeza uongozi na watumishi wa afya wa Mikoa ya Arusha na Morogoro, kwa kuendelea kutoa taarifa za ugonjwa wa Kipindupindu. Aidha ninatoa rai kwa Mikoa mingine wahakikishe usahihi wa taarifa wanazotoa na kujiridhisha hakuna kweli wagonjwa wa Kipindupindu katika Mikoa yao. Ningependa kusisitiza kwamba Wizara yangu haitasita kuwachukulia hatua Waganga Wakuu wa Mikoa watakaobainika kutotoa taarifa zisizo sahihi za wagonjwa wa Kipindupindu na magonjwa mengine ya mlipuko.

Hatua tuliyoifikia katika kupambana na mlipuko huu inatutaka tuendelee kuzidisha  juhudi za kupambana na ugonjwa huu kwa kusimamia kikamilifu maelekezo na miongozo stahili inayotolewa na Wizara yangu ili kuutokomeza kabisa ugonjwa huu. Hivyo ni muhimu Mikoa yote kuendelea kuchukua hatua za tahadhari ili kuzuia maambukizi na pia kuendelea kutoa taarifa sahihi kila siku na kusimamia kikamilifu hatua mbalimbali za udhibiti wa mlipuko huu.

Tunaendelea kuisihi jamii kuungana na Halmashauri, Mikoa pamoja na Wizara katika juhudi za kupambana na kuenea kwa ugonjwa wa kipindupindu kwa kuzingatia yafuatayo:

• Utoaji na upatikanaji wa takwimu sahihi za ugonjwa kwa kuzingatia miongozo iliyotolewa na Wizara bila kuingiliwa na viongozi wa kisiasa au kiserikali.
• Kujenga na kutumia vyoo bora katika maeneo yote ya mjini na vijijini ili kupunguza hatari ya kuenea kwa ukongwa huu.

• Kuhakikisha upatikanaji wa maji safi na salama kupitia Mamlaka za maji zilizopo katika ngazi zote.
• Kuhakikisha utunzaji salama wa maji ya kunywa yaliyotibiwa.
• Kuwahi kupata matibabu mapema katika vituo vya kutolea huduma.
• Kuhakikisha upatikanaji na matumizi sahihi ya ORS katika maeneo mbali mbali nchini ili kupunguza athari za ugonjwa.

Wizara inapenda pia kuwajulisha kuwepo kwa taarifa ya wagonjwa 4 wa ugonjwa wa kupooza kutoka katika Mikoa ya Dodoma na Tabora katika Halmashauri za; Kongwa (2), Kaliua (1) na Urambo (1). Wagonjwa hawa waliopata ugonjwa wa kupooza wa ghafla waligundulika kuwa na ugonjwa wa polio baada ya sampuli zilizochukuliwa na kupelekwa maabara kwa ajili ya upimaji, ikiwa ni zoezi la kawaida la ufuatiliaji wa magonjwa yanayozuilika kwa chanjo, kuthibitisha kuwa na virusi vinavyosababisha polio.

Itakumbukwa kuwa nchi yetu ilitangazwa rasmi kuwa mojawapo ya nchi za Afrika zisizokuwa na ugonjwa wa polio tarehe 26 Novemba, 2015, na taarifa hii imechukuliwa kwa uzito na Wizara yangu. Wizara imekwisha kuchukua hatua za haraka za kudhibiti ugonjwa huo ambapo Timu ya Wataalam ilitumwa kwenda Mkoani Dodoma na Tabora na mikoa ya jirani ili kufanya ufuatiliaji wa kina na kutoa ushauri wa kuzuia kusambaa kwa virusi vya polio. Hadi sasa hakuna wagonjwa wapya walioripotiwa na hakuna ongezeko la wagonjwa katika Halmashauri ambazo zimegundulika kuwa na wagonjwa

Uwepo wa wagonjwa hao wanne wenye polio ni kielelezo cha umuhimu wa kuendelea kufuatilia kwa ukaribu magonjwa yote yanayozuilika kwa chanjo. Hivyo Wizara yangu inapenda kutoa rai kwa wadau wote na taasisi zinazofanya kazi katika jamii na vyombo mbalimbali  kuendele kuhamasisha jamii ili watoto wote wapate chanjo kulingana na ratiba. Aidha, waongeze juhudi katika kutoa taarifa kwenye vituo vya huduma za afya vilivyopo karibu mara wanapoona au kupata taarifa ya mtoto yoyote anayepata ulemavu wa ghafla pasipo sababu yoyote.

Wizara inaendelea kuwapongeza na kuwashukuru wadau wote kwa jitihada za dhati zinazoendelea kutekelezwa katika kusimamia kikamilifu miongozo inayotolewa na Wizara ili kutokomeza magonjwa ya milipuko, ikiwa ni pamoja na wataalamu wa sekta mbalimbali, Mashirika ya Kimataifa, Watumishi, Mikoa na Halmashauri pamoja na waandishi wa habari na wananchi kwa ujumla.