MILIONI 50 KWA KILA KIJIJI ZITATOKA MWAKANI ASEMA WAZIRI MKUU

Na Mwamvua Mwinyi,Kibiti

WAZIRI mkuu Kassim Majaliwa,amesema mpango wa kutoa mil.50 vijijini ambao ulioahidiwa na serikali,unatarajiwa kuanza mwakani baada ya kupitisha bajeti ya fedha 2017-2018.

Aidha amewatahadhalisha wananchi wasidanganywe na kutapeliwa na baadhi ya watu wanaotaka kujipatia fedha wakiwashawishi waunde vikundi kisha kuwachangisha fedha za usajili wa vikundi hivyo.

Majaliwa ameeleza kuwa mpango huo ukiwa tayari serikali itatangaza rasmi na kutoa taarifa kwa viongozi mbalimbali wakiwemo wakuu wa mikoa,wilaya na wabunge ili waweze kutaarifu watu kwenye maeneo yao.

Ameeleza mpango huo, upo pale pale ambapo fedha hizo zitatengwa kwa ajili ya kuwezesha makundi ya vijana,wanawake na mengine kwa lengo la kuwainua kiuchumi.

Waziri mkuu aliyasema hayo ,wilayani Kibiti,baada ya mbunge wa jimbo hilo Ally Ung’ando kutoa kueleza kero inayowakabili vijana kukosa ajira na kusuasua kwa kiwanda cha samaki ambacho hakifanyikazi.

Hata hivyo alieleza kuwa bunge lijalo ndilo litatangaza fedha zitakazotengwa kwa ajili ya mpango huo pamoja na utaratibu utakaotakiwa kufutwa utatangazwa katika kipindi hicho.

Majaliwa alisema fedha hizo zitasaidia kukopesha makundi mbalimbali yaliyopo kwenye vijiji ili kuzalisha na kuinua biashara zao.

“Mkisikia mtu anakuja kuwaambia suala la mil.50 leo huyo ni tapeli,mpango huo bado,tutakapokuwa tayari mbunge atapata taarifa na kuwaambia na serikali itaeleza mpango huo ukianza.”

“Fedha hizo sio za  kugawa na fedha hizi hazijaanza na ninaeleza kutaarifa kuna matapeli wanaanza kuwadangaya unda vikundi unda vikundi ,na baada ya hapo wakitakamchangie 10,000 kwa watu 30 ama 40 na kujipatia fedha,kuweni macho”alisema Majaliwa.

Akizungumzia kuhusu viwanda alivitaka vijengwe na vifanyekazi ili kutoa wigo mkubwa wa ajira ndani ya jamii ikiwemo vijana ambao wanatangatanga kusaka ajira.

Majaliwa alisema kuchelewa kufanya kazi kwa kiwanda cha samaki na kiwanda cha kuchakata muhogo vilivyopo Kibiti,atakutana nao ,ili wamueleze walipokwama na kutafuta ufumbuzi.

Alieleza lengo la serikali ni kuinua sekta ya viwanda kwa kushirikiana na kukaribisha wawekezaji wa ndani na nje kuja kuwekeza kwenye viwanda kwa malengo makuu matatu

Majaliwa alisema viwanda vingi vikijengwa vitasaidia kuongeza wigo wa ajira nchini,kuinua uchumi na kuuza mazao mbalimbali yanayolimwa na kuyaongezea thamani kuliko kuuza mmoja mmoja mashambani.

Alisema atakaa na kufuatilia tatizo linalowakwamisha wenye kiwanda cha samaki na cha kuchakata muhogo vilivopo wilayani hapo ili kutafuta ufumbuzi na vifanye kazi kwa maslahi ya jamii.

Awali mbunge wa jimbo la Kibiti ,Ally Ung’ando ,alimwambia wziri mkuu kuwa kuna changamoto ya fedha za vijana na wanawake kutotolewa kwa wakati .

Alitaja kero nyingine kuwa ni tatizo la ukosefu wa ajira kwa vijana hao na kukosa mikopo na mitaji suala linalosababisha vijana wengi kushindwa kufanya ujasiliamali.

Ung’ando alisema huwa akikaa na baadhi ya vijana na kuwashauri wajiunge vikundi jambo litakalowawezesha kusaidiwa kirahisi na taasisi mbalimbali na halmashauri kuliko kujiweka mtu mmoja mmoja.