CCM BAGAMOYO YAJIGAMBA KUSHINDA UCHAGUZI MDOGO WA VITONGOJI

Katibu wa UWT wilaya ya Bagamoyo,Mwatabu Hussein (kulia)aliyemshika mgombea wa uenyekiti kitongoji cha Magomeni B Rajabu Swedy,wakishangilia baada ya kuzindua kampeni za uchaguzi mdogo wa kitongoji hicho.

Mwenyekiti wa UWT Bagamoyo,Apsa Kilingo akizungumza jambo wakati wa kampeni za uchaguzi mdogo kitongoji cha Magomeni B,kata ya Nianjema.

Mwenyekiti wa jumuiya ya wazazi ya CCM ,wilayani Bagamoyo,Abdul Sharif ,ambae pia ni meneja kampeni wa uchaguzi mdogo kitongoji cha Magomeni B,kata ya Nianjema,akizungumza jambo kwenye uzinduzi wa kampeni hizo.(picha na Mwamvua Mwinyi)

Mwenyekiti wa CCM Bagamoyo,Almas Maskuz wa kulia akimnadi ,mgombea wa nafasi ya mwenyekiti wa kitongoji cha Magomeni B kata ya Nianjema wa kushoto Rajabu Swedy .(picha na Mwamvua Mwinyi)

Na Mwamvua Mwinyi,Bagamoyo

WANANCHI na wanaCCM wilayani Bagamoyo,wametakiwa wasijaribu wala kufanya makosa kuchagua vyama vya upinzani katika uchaguzi mdogo wa vitongoji ikiwemo cha Magomeni B .

Kimesema hakikubahatisha kumsimamisha Rajab Swedy(M-baga)kuwa mgombea wa nafasi ya mwenyekiti wa kitongoji hicho kwani kinaamini ana uwezo na sifa za kiuongozi.

Mwenyekiti wa jumuiya ya wazazi ya chama cha mapinduzi wilaya ya Bagamoyo,Abdul Sharif aliyasema hayo wakati akimnadi mgombea huyo kwa wananchi.

Alieleza kwamba,Swedy ni kijana makini,msomi na mpenda maendeleo hivyo ana uwezo wa kukiongoza kitongoji hi

Aidha Sharif alisema CCM imesimamia ilani yake kikamilifu na kuitendea haki katika kutatua kero za wananchi ndani ya miaka 40 iliyopita.

Hata hivyo alisema, CCM bado ina nguvu ya kuongoza kuanzia ngazi za chini kwani kinatekeleza ilani yake na kushughulikia kero za wananchi na kujali watu wanyonge.

“Vyama vya upinzani vinaonyesha udhaifu tangu chini kutokana kushindwa kuwatumikia wananchi ”alisema .

Sharif ambae pia ni meneja wa kampeni ya mgombea wa kitongoji cha Magomeni B,alisema vyama vya upinzani havina nafasi kwa sasa kwani CCM inaonekana inavyofanyakazi kupitia viongozi wake wanaowajibika ipasavyo.

Nae mwenyekiti wa CCM Bagamoyo,Almas Maskuzi aliwaomba wananchi wa kitongoji cha Magomeni B,kumchagua Rajab Swedy kuwa mwenyekiti wao wa kitongoji .

Alisema CCM wilaya,imejipanga kushinda katika chaguzi zote ndogo za nafasi ya vitongoji vitatu vinavyorudia uchaguzi ikiwemo     Mwavi ,Zinga na Magomeni B.

Maskuzi alisema ni wakati wa wanaCCM kusaka kura nyingi kwa wananchi kwa kuwanadi wagombea waliosimamishwa na kueleza sifa za chama cha mapinduzi na yale ambayo imekwisha yafanya.

Kwa upande wake mgombea wa kitongoji hicho,Rajabu Swedy aliahidi kutatua ama kusimamia kero ya maji na barabara ambazo zinasumbua kwenye eneo hilo kipindi kirefu sasa.

Swedy aliomba kura kwa wapenzi wa CCM,wananchi na wanaCCM wote bila kujali itikadi za kisiasa na kusema ataomba ushirikiano wao endapo watamchagua.

Uchaguzi huo,unatarajiwa kufanyika februari 19 mwaka huu katika vitongoji vyote ambavyo vinapaswa kurejea uchaguzi huo kwa mujibu wa taratibu na sheria.