CCM Z’BAR YAWATAKA WAFUASI WAKE KUTANGULIZA MBELE DHANA YA UZALENDO.

Na  Is-haka Omar, Zanzibar.

WAFUASI wa Chama Cha Mapinduzi (CCM ) Zanzibar wameshauriwa kufuata nyayo za waasisi wa Chama hicho kwa kujitolea na kuweka mbele dhana ya uzalendo katika kujenga miundombinu ya kudumu itakayowasaidia  vizazi vya sasa na vijavyo.

Ushauri huo umetolewa na Naibu Katibu Mkuu wa CCM Zanzibar, Vuai Ali Vuai wakati akifungua kongamano la CCM Wilaya ya Kati Unguja, amesema maendeleo yaliyopatikana ndani ya serikali na chama yametokana na juhudi kubwa zilizofanywa na wazee wa chama hicho.

Aliwataka wafuasi wa CCM kila mtu kwa nafasi yake kufanya jambo la maendeleo litakalobaki katika vitabu na historia ya kumbukumbu za chama ili vizazi vijavyo virithi taasisi yenye nguvu katika suala la maendeleo na ukuaji wa uchumi.

Vuai alisema waasisi hao wameacha miundombinu na vitega uchumi mbali mbali vikiwemo miundombinu katika sekta mbali mbali zikiwemo Afya, Elimu na majumba ya maendeleo yaliyopo kila mikoa nchini ambayo ni matunda ya waasisi wa muungano na Mapinduzi ya Zanzibar ya mwaka 1964.

“ Wazee wetu wamefanya mengi ambayo ndiyo tunayojivunia kwa sasa katika nyanja mbali mbali za kiuchumi, kijamii na kisiasa, hivyo nasaha zangu na sisi tukiwa Wana CCM wa zama hizi lazima tubuni mambo mapya yatakayowanufaisha vizazi vijavyo.”, alieleza Vuai na kuongeza kuwa CCM mpya itajengwa na fikra mpya zitakazosaidia kuinua maendeo ya chama.

Akizungumzia miaka 40 ya kuzaliwa kwa Chama hicho alisema wananchi wa mijini na vijijini wameweza kunufaika na fursa mbali mbali zinazotokana na sera za chama.

Alisema wakati CCM inazaliwa mwaka 1977 ASP ilikuwa na miaka 20 na CCM imetimiza miaka 40 ambayo kwa ujumla wake ni miaka 60 wakati ambao chama hicho kimekuwa kinara wa Utawala bora na Demokrasia kwa wananchi wa makundi yote.

Aidha, aliwataka viongozi na watendaji wa Chama na Jumuiya zake kuanzia ngazi za Matawi kutekeleza kwa vitendo agizo la CCM katika kuadhimisha miaka 40 ya kuzaliwa kwa taasisi hiyo kwa mtindo wa kufanya shughuli za maendeleo na ujenzi wa taifa kwa kipindi cha mwaka mzima.

“ Nahitaji kuona ofisi zetu kuanzia ngazi za Matawi hadi Mikoa kunafanyika shughul za ujenzi wa taifa zinazoashiria kuzaliwa kwa Chama chetu, na kufanya shughuli za maendeleo katika Sekta mbali mbali kijamii zikiwemo vituo vya watoto yatima, Nyumba za kulelea  Wazee, Vituo vya Afya na Mahospitalini Unguja na Pemba.”, alisisitiza Naibu Katibu Mkuu huyo wa CCM Zanzibar.

Aliwapongeza Rais wa Zanzibar na Mwenyekiti wa Baraza la Mapinduzi Dkt. Ali Mohamed Shein pamoja na Rais wa Jamhuri ya Muungano wa Tanzania Dkt. John Pembe Magufuli kwa juhudi zao za kusimamia kwa uadilifu fursa za kimaendeleo kwa maslahi ya nchi.

Pia alikiri kuthamini juhudi zinazofanywa na uongozi wa Chama wa Wilaya hiyo kwa Kusimamia vizuri utekelezaji wa Ilani ya Uchaguzi ya CCM ya mwaka 2010/2020, na kuwaagiza waendelee kuratibu na kufuatilia kwa karibu shughuli zinazofanywa na Wawakilishi, Wabunge na Madiwani ndani ya Wilaya hiyo. 

Akisoma taarifa ya utekelezaji wa shughuli za Kisiasa ndani ya Wilaya hiyo, Katibu wa CCM Wilaya ya Kati Unguja, Ali Yussuf alisema viongozi wa wilaya hiyo kwa kushirikiana na makada wa Chama wametekeleza shughuli za ujenzi wa taifa zikiwemo kufanya usafi na mikutano ya ndani ikiwa ni moja ya shamrashamra za kuzaliwa kwa CCM.

Katibu huyo alifafanua kuwa Wilaya hiyo imejipanga kikamilifu katika kukabiliana na chaguzi za  Kichama na jumuiya kwa lengo la kupatikana viongozi makini na wenye sifa za kuvusha salama jahazi la CCM katika uwanja wa kisiasa.

Hata hivyo amesema wanaendelea na ziara maalum kunzia ngazi za mashina hadi Wilaya kwa lengo la kukagua hali ya kisiasa na kuratibu changamoto zinazowakabili wananchi wa maeneo mbali mbali  ili zitafutiwe ufumbuzi wa kudumu kupitia mamlaka husika.