SHEIN KUCHUKUA FOMU YA URAIS ZANZIBAR

MAKAMU Mwenyekiti wa Chama Cha Mapinduzi (CCM) Zanzibar, Dk Ali Mohamed Shein leo anatarajiwa kuchukua fomu ya kuomba ridhaa ya kuwania nafasi ya urais wa Zanzibar kwa tiketi ya CCM, Ofisi Kuu ya CCM Kisiwandui mjini hapa.

Kwa mujibu wa taarifa iliyotolewa na Katibu wa Kamati Maalumu ya Halmashauri Kuu, Itikadi na Uenezi ya CCM Zanzibar Waride Bakari Jabu, Dk Shein ambaye ni Rais wa Zanzibar atakabidhiwa fomu ya urais na Naibu Katibu Mkuu wa CCM Zanzibar, Vuai Ali Vuai.

Waride alisema mara baada ya Dk Shein kukabidhiwa fomu ya kuomba ridhaa ya kuwania nafasi ya urais kwa tiketi ya CCM, atazungumza na viongozi wa chama hicho wakiwemo wa wilaya na mikoa ya Unguja na Pemba.

Baadhi ya viongozi ambao atapata nafasi ya kuzungumza nao ni pamoja na wazee wa chama na waasisi wa mikoa mitatu ya Unguja na Pemba.

DK Shein anakuwa mgombea wa kwanza wa CCM kuchukua fomu kuwania nafasi ya urais wa Zanzibar kwa tiketi ya chama hicho, ingawa kwa upande wa upinzani, Katibu Mkuu wa CUF, Maalim Seif Shariff Hamad ambaye pia ni Makamu wa Kwanza wa Rais wa Zanzibar ameshachukua fomu.

Wawili hao walichuana katika uchaguzi mkuu uliopita na Dk Shein kutangazwa mshindi, lakini baadaye iliundwa Serikali ya Umoja wa Kitaifa.

Taarifa ya chama hicho imesema kwamba hadi sasa hakuna jina la mwanachama wa CCM aliyetangaza nia ya kutaka kuchukua fomu kuwania nafasi hiyo ya juu ya uongozi kwa Chama Cha Mapinduzi.(HABARI LEO)