MOTO WAUNGUZA MADUKA MOROGORO

Maduka sita yanayozunguka Soko Kuu la Morogoro, yameteketea kwa moto kutokana na hitilafu ya umeme na kuwasababishia hasara wafanyabiashara ambayo thamani yake haijajulikana.

Mashuhuda na wamiliki wa maduka hayo, walidai kuwa moto huo ulianzia kwenye duka la mmoja wao usiku wa kuamkia juzi baada ya Shirika la Umeme Tanzania (Tanesco) Mkoa wa Morogoro, kurejesha umeme na kusambaa kwenye maduka mengine.

Mmoja wa wafanyabiashara, Didas Mushi, alilitupia lawama Tanesco kwa kuwa chanzo cha moto huo kutokana na kukata umeme mara kwa mara na kuurejesha bila ya kutoa taarifa.

“Chanzo kwa maduka haya kuungua ni kukatika kwa umeme wa Tanesco mara kwa mara bila kutoa taarifa na uliporudisha majira ya saa sita usiku (juzi) ulitokea mlipuko na moto kusambaa hadi kwenye maduka mengine,” alisema Mushi.

Mfanyabiashara wa nguo, Masanja Okwima, alisema kuungua kwa maduka hayo kumewasababishia hasara ya zaidi ya Sh. milioni 10 na kuitaka Tanesco kulipa gharama hizo kwakuwa wao ndio chanzo cha moto huo.

Ofisa Uhusiano wa Tanesco Mkoa wa Morogoro, Marcio Semfukwe, alithibitisha moto huo kusababishwa na hitilafu ya umeme ambayo huenda imesababishwa na mmoja wa wafanyabiashara hao kuunganisha nishati hiyo bila kibali cha shirika hilo.

Kamanda wa Polisi Mkoa wa Morogoro, Leonard Paulo, alithibitisha kutokea kwa tukio hilo na kusisitiza kuwa wanaendelea kufanya uchunguzi.