SHIRIKA LA ELIMU KIBAHA KULIPWA MAMILIONI YA FEDHA KWA MIAKA 66

Mkurugenzi wa shirika la Organia kutoka Saudi Arabia na Egypt linalojihusisha na uzalishaji kuku Abdulhady Taher wa kwanza kulia, akimuelezea jambo mkuu wa mkoa wa Pwani mhandisi Evarist Ndikilo (wa katika kati)wakati mkuu wa mkoa huyo alipotembelea miradi mbalimbali iliyoanzishwa na  shirika la elimu Kibaha,wa kwanza kulia ni mkuu wa wilaya ya Kibaha Halima Kihemba,wa pili kulia mkurugenzi KEC Cyprian Mpemba.(Picha na Mwamvua Mwinyi)

Mkuu wa mkoa wa Pwani,mhandisi Evarist Ndikilo wa kwanza kushoto akimsikiliza mkurugenzi wa shirika la Organia kutoka Saudi Arabia na Egypt linalojihusisha na uzalishaji kuku wa katikati Abdulhady Taher ,akielezea juu ya shughuli za uwekezaji walizoingia mkataba na shirika la elimu Kibaha,wa kulia ni mkurugenzi wa KEC Cyprian Mpemba,(Picha na Mwamvua Mwinyi)

………………………………………………………………………………….

Na Mwamvua Mwinyi,Pwani,

SHIRIKA la elimu Kibaha (KEC)mkoani Pwani linatarajia kuingiza mapato ya kiasi cha sh,mil 100 kila mwaka kwa miaka 66 ijayo baada ya kuingia mkataba wa uwekezaji  na shirika la Organia kutoka Saudi Arabia na Egypt ambalo linajishughulisha na uzalishaji kuku kwa niia ya kitaalamu.

Ujenzi wa mradi huo unatarajiwa kukamilika mwezi Juni mwaka 2016 ambapo utagharimu fedha za kimarekani kiasi cha sh.Milioni 60 ikiwa ni sawa na fedha za kitanzania sh.Bilioni 120.

Shirika la elimu Kibaha limeamua kufanya jitihada za kuanzisha miradi mbalimbali kwa kushirikiana na makampuni na mashirika mbalimbali ya ndani na nje ya nchi ili kujiongezea mapato na kuondokana na utegemezi.  

Akitoa taarifa ya shirika,wakati mkuu wa mkoa wa Pwani mhandisi Evarist Ndikilo ,alipotembelea shirika hilo,mkurugenzi wa shirika la elimu Kibaha,Cyprian Mpemba alisema miradi ndio nguzo pekee ya kuwainua kimapato.

Mpemba alielezea kuwa shirika limekuwa likipambana na uhaba wa fedha kutokana na kujiendesha kwa kipindi kirefu hivyo muarobaini wa kuondokana na uhaba huo ni kuanzisha miradi ambayo italeta tija katika shirika na wananchi wa Kibaha kijumla.

Aidha alitaja mafanikio mengine kuwa ni wawekezaji hao kushirikiana nao kwenye shughuli za kijamii na shirika kuongeza mapato yake kutoka sh.300,000 hadi kufikia zaidi ya sh mil.3 kutokana na kuingia katika mfumo wa kukusanya fedha kwa njia ya mtandao uitwao 4pay.

Mpemba alisema mapato hayo yameongezeaka baada ya shirika kufanya uchunguzi na kubaini wizi wa kutumia risiti na ujanja unaofanywa na baadhi ya watumishi kuliibia shirika.

Hata hivyo alisema kwasasa wameanza na mfumo mwingine unaoitwa GoT HoMIS Defined ambao upo chini ya ofisi ya waziri mkuu (TAMISEMI)utakaosaidia kuongeza mapato zaid na kugundua wizi unaofanyika kwa haraka .

Nae mkurugenzi wa shirika hilo la kimataifa la Organia,Abdulhady Taher akielezea juu ya mradi huo utakavyoendeshwa alisema watazalisha kuku wa aina yake Afrika Mashariki na kutakuwa na mabanda 17 ambapo kila banda litazalisha kukuwa 35,000.

Alisema mradi huo utakapoanza utahitaji tani 8,000 za mahindi ya njano na soya kwa ajili ya chakula cha kuku na watahitaji yapatikane mkoani hapo na endapo hayatakuwepo watayaagiza nje ya nchi.

Taher alisema mradi huo pia utawezesha kupata ajira 1,200 na kipaombele chao ni kuajiri kwanza wazawa wa Mji wa Kibaha na mkoa wa Pwani.

Aliiomba serikali kuwasaidia upatikanaji wa umeme na maji ya uhakika kwani mradi huo ni mkubwa na utahitaji huduma hizo kwa kiasi kikubwa.

Kwa upande wake mkuu wa mkoa wa Pwani,mhandisi Evarist Ndikilo alisema kuwatatizo la uhaba wa  ajira   ambalo limekuwa likiwasumbua wakazi wa Mji wa Kibaha na Mkoa wa Pwani kwa ujumla huenda likapatiwa ufumbuzi mara baada ya kuanza mradi huo.

Ndikilo  aliwahimiza wakazi wa mkoa huo kulima kwa wingi mahindi ya njano ili wapate soko la uhakika katika kiwanda hicho ambacho kitahitaji mahindi hayo na soya kwa ajili ya kuku.

Aliwaahidi wawekezaji huo kulishughulikia suala la umeme na maji kwa kulifikisha katika wizara ama idara husika ili lipatiwe ufumbuzi.

Mhandisi Ndikilo aliuambia uongozi wa shirika hilo kuwa ni vyema suala la kupatikana mwenyekiti wa bodi ya shirika la elimu likashughulikiwa kwani ni muda mrefu shirika hilo halina mwenyekiti ambae watashirikiana nae kusukuma maendeleo ya shirika.

Alilipongeza shirika kwa hatua wanazozichukua za kimaendeleo na kutokana na mambo mazuri yanayofanyika ataangalia uwezekano wa kuomba mh.Rais wa jamhuri ya muungano wa Tanzania Dk Jakaya Kikwete wakati wa ziara ya kuwaaga wakazi wa mkoa huo utengwe muda wa kutembelea miradi hiyo ili atambue anauacha mkoa ukiwa umepiga hatua.

Shirika la elimu Kibaha lilianzishwa mwaka 1970 ambapo miaka ya 60 lilikuwa likiongozwa na nchi za Nordic ikiwemo nchi ya Norway na Dermark ,na lina ardhi yenye ukubwa wa hekta 1,357.