MSTAHIKI MEYA WA MANISPAA YA KINONDONI YUSUPH MWENDA AKABIDHI ZAWADI ZA PASAKA KWA MAYATIMA

Meya wa Manispaa ya Kinondoni, Yusuph Mwenda akizungumza na waandishi wa habari baada ya kukabidhi msaada wa vyakula kwa vikundi hivyo.

Meya wa Manispaa ya Kinondoni, Yusuph Mwenda akikabidhi msaada wa vyakula na vitu mbalimbali kwa watoto wa kituo cha kulea watoto yatima cha Malaika kwa ajili ya kusherehekea Sikukuu ya Pasaka, Dar es Salaam jana.                         

…………………………………………………………………………………….

NA MWANDISHI WETU,

MEYA wa Manispaa ya Kinondoni, Yusuph Mwenda amekabidhi msaada wa vyakula na vitu mbalimbali vyenya thamani ya shilingi milioni 2.5 kwa vikundi vitatu vya kulea watoto yatima, Dar es Salaam jana kwa ajili ya kusherehekea Sikukuu ya Pasaka.

Akikabidhi msaada huo Meya Yusuph Mwenda aliwataka watanzania kuwa na moyo wa kusaidia watoto hao hususan katika msimu wa Sikukuu ikiwa ni njia mojawapo ya kuwafariji watoto hao.

“Hakuna anayependa kuona watoto hawa wanaongezeka mitaani, Na Serikali inafanya juhudi kubwa kuondoa tatizo la watoto hawa hasa wanaotelekezwa mitaani lakini peke yake haiwezi, ni lazima wananchi muunge mkono juhudi hizo.” Alisema Mwenda.

Alisema kuwa badala ya watu kusherehekea Sikukuu majumbani mwao ni vema wakajumuika na watoto hao ili kuwafanya nao wajisikie wapo na wazazi wao.

Msaada aliotoa Meya huyo ni pamoja na Mchele, Sukari, Mafuta, Unga wa Ngano, Unga wa Sembe, Sabuni za miche na unga, Mbuzi na vitu vingine.