SAMATTA AING’ARISHA GENK EUROPA LEAGUE,YAICHAPA BILBAO.

Wakicheza katika uwanja wa Cristal Arena nchini Ubelgiji wenyeji KRC Genk imepata ushindi wa pili michuano ya kombe la Europa baada ya kuwahenyesha Athletic Bilbao jumla ya mabao 2-0.

Kijana wa Kijapan Leon Bailey alikuwa mwiba kwa mabeki wa Bilbao kwani kila muda alikuwa anaichachafya ngome na mnamo katika dakika ya 40 alitoa pasi safi kwa Jakub Brabec na kuiandika Genk bao la uongozi hadi mapumziko wenyeji walikuwa mbele.

Kipindi cha pili kilianza kwa Genk kufanya mabadiliko kwa kumtoa Thomas Buffel na nafasi yake kuchukuliwa na Mtanzania Mbwana Samatta dakika ya 56 kuingia kwa Samatta kulileta uhai tena katika safu ya ushambuliaji.

Samatta alionesha kuwa yeye sio mtu wa mchezo kwa kusababisha bao la pili dakika ya 84 likifungwa na Onyinye Ndidi kwa shuti kali lililoenda moja kwa moja na kuwafanya Bilbao kutoka nje kwa huzuni hadi mwamuzi Stefan Johannesson anamaliza mpira Genk wameibuka na ushindi wa mabao 2-0.

Kwa matokeo hayo Genk wanashikilia usukani mwa msimamo wa kundi F wakiwa na alama 6 wakati Bilbao wana alama 3 na kushika nafasi ya mwisho na Rapid Vienna na Sassuolo zote zikiwa na alama 4 baada ya kutoka sare ya kufungana bao 1-1,timu hizi zitarudiana Novemba 3 mwaka huu.